Panama Amerika Qiterlermi kunngiitsuuffiuvoq. Nuna avannamut Caribiap Imartaanit, kujammut Manerassuarmit, kimmut Costa Ricamit kangimullu Columbiamit killiligaavoq. Nunap qeqqa qaqqaqarpoq uiguleriinnik qatsissortaa narsaqarluni, kitaa qaqqaavoq innermik anitsisartulinnik; kangianiipput nuna pukkitsoq kiattullu orpippassui akulikitsut; avannaaniipput kujataaniilutillu sinerissap narsai pukkitsut ivigallit. Panamap Ikerasaata Caribiap Imartaa Manerassuarlu katiguppai.

Kiattorsuarmik klimaqarpoq isugutasumik, piffissami sivisuumi maajimit januaarimut siallersartumik.

Nunap pisuussutai pingaarnerit tassaapput qisuit raajallu. Naasorissaanermi bananit, kaffe kakaolu nunanut allanut niuerutissat kiisalu qaqorteqqasut, majsit bønnillu namminermut tunisassiaasarput. Panamap Ikerasaanut attuumassuteqartumik kiffartuussineq takornariaqarnerlu aningaasarsiornermut annertuumik pingaaruteqarput.

Panama nunaavoq piitsoq, inuuniarnikkut aningaasarsiornikkullu assigiinngissutinik annertuunik, suliffissaaleqinermik annertuumik inuussutissanillu amigaateqarnermik ajornartorsiuteqartoq.