Colombia Amerika Kujalliup avannaata kitaani kunngiitsuuffiuvoq. Nunap kimmut Manerassuaq avannamullu kangimut Caribiap Imartaa sineriaqarfigai. Nunap kitaatungaani qeqqanilu Andesip Qaqqai kuussuillu qooqqersimaneri annertunersaapput, orpippassuaqarfiillu annertuut kitaaniillutik. Nunataata kujataata kangia pukkitsuuvoq, narsaalluni kiattullu orpippassuaqarluni.

Klimaa kiattorsuup klimaanit qatsinnerusumi akunnannerusumut nillernerusumullu allanngorarpoq. Innermik anitsisoqartarpoq akulikitsumillu nuna sajuttarluni.

Nuna annertuunik uuliaqarfeqarpoq, naturgasseqarfeqarluni, aamarsuaqarfeqarluni, kuulteqarfeqarluni, sølveqarfeqarluni, kanngussaqarfeqarluni, aqerloqarfeqarluni, kviksølveqarfeqarluni, manganeqarfeqarluni smaragdeqarfeqarlunilu kiisalu annertuumik ermup nukissiornissamut periarfissaqarluni. Naasorissaanermi naatinneqartartut kaffit pingaarnersaraat. Inerteqqutaasumik kokain aamma marihuana naatinneqartarput.

Colombiap piitsuuneq, inuit imminnut sorsuunnerat, atorfinnik atornerluinerit, nakuusernerit, aallarussisarnerit kokaineerniaqatigiinnullu sorsunnerit ajornartorsiutigiuarpai.