Surinami kunngiitsuuffiuvoq, Amerika Kujalliup avannaata kangianiittoq. Nuna kimmut Guyanamit, kujammut Brasiliamit, kangimut Fransk Guyanamit avannamullu Atlantikumit killiligaavoq. Nunap avannaata tungaa sineriaavoq narsaasoq masarsulik, pukkitsuulluni mangrovep orpippassualik. Nunap sinnera qatsissoq narsaavoq, portusuujullunilu akulikitsunik kiattup orpippassualik kuussuaqartorlu.

Kiattorsuarmik klimaqarpoq.

Nunap pisuussutai pingaarnerit tassaapput bauxit, aluminiuliornermut atugaasoq, qisuit, ermup nukinga, raajat, uulia, kuulti diamantillu. Naasorissaaneq killilimmik ingerlanneqarpoq, kisianni ilaatigut qaqorteqqasut, bananit, sukkerrørit, kokosnøddit, kaffit kakaollu naatinneqartarput.

Surinami 1975-imut Hollandimiut nunasiaatigaat, Hollandsk Guyanamik taaguuteqarluni. Nunap politikkikkut eqqissisimannginneq aningaasarsiornikkullu ingerlanerliorneq ajornartorsiutigai.