Sudani Afrikap avannaa-kangiani kunngiitsuuffiuvoq, Imaq Aappalaartumut sineriaqarluni. Egypteni, Libya, Tchad, Den Centralafrikanske Republiki, Sudani Kujalleq, Etiopia Eritrealu killeqarfigai. Nunataa avannaani inoqajuitsuuvoq manissoq, avannaa-kangia qaqqaqarpoq, kitaa narsaqarpoq manissunik, kujataa-kitaa kiattup orpippassuaqarpoq, kujataa masarsoqarfeqarpoq savanneqarfeqarlunilu kiisalu nunap qeqqani kangianilu Nilenip eqqaani naasorissaaneq ingerlanneqarpoq.

Silaannaa kiattuuvoq panerluni, pingaartumik nunap avannaa-tungaani. Apriili-novembari siallersarfiusarpoq.

Nunap pisuussutai pingaarnerit tassaapput imeq Nilenimeersoq uulialu. Sesam, hirse, annoraassiassat, jordnøddit gummilu nunanut allanut niuerutissatut naatinneqartarput.

Sudani 1956-imi Tuluit Nunaannit namminiilerpoq. Siusinnerusukkut Sudaniusoq 2011-mi maannakkut Sudanimut aamma Sudani Kujallermut avinneqarpoq. Sudanimi sorsuunnerit atuuttarsimaqaat.