Tunesia Afrikap avannaani kunngiitsuuffiuvoq. Nunap kimmut Algeria kujammut-kangimullu Libya killeqarfigai, avannamigut avannamut-kangimigut Imaq Akullersuaq sineriaqarfigalugu. Nunataata avannaa qaqqaqarpoq, orpippassuaqarpoq qooroqarluni kuussuartalinnik, qeqqa qatsissumiittoq narsarsuaqarluni ivigalinnik, masarsuuvoq taseqarlunilu tarajornitsunik kujataalu inoqajuitsuuvoq, oaseqarluni taseqarlunilu tarajornitsunik.

Tunesia kiattumik klimaqarpoq. Kujataa narsarsuaqarpoq ivigalinnik orpigarasaartunik inoqajuitsoqarfiullunilu.

Naasorissaaneq inuutissarsiutini pingaarnersaavoq, ilaatigut citrusip paarnai, vindruuat, qajuusiassat, oliven, suaasiassat, daddelit naatitallu naatinneqartarput. Aalisarneq, takornariaqarneq uuliasiorneq kiisalu fosfatimik, naturgassimik, aqerlussamik, zinkimik, tinimik saviminissamillu piiaaneq aningaasarsiornermut annertuumik pingaaruteqarput.

Tunesia siusinnerusukkut franskit nunasiaatigaat. 1956-imi namminiilerpoq. Innuttaasut akulikitsumik atorfillit atorfimminnik atornerluinerannut akerliussutsiminnik takutitsisarput, piitsuunerlu annertuvoq.