Laosi kujataa-kangiani kunngiitsuuffiuvoq. Nunap timaaniittuuvoq Vietnami, Cambodja, Thailandi, Myanmari (Burma) Kinalu killeqarfigalugit. Nunataa qaqqartuvoq, ilarujussualu orpippassuaqarluni. Kangianiipput qaqqat uiguleriit, kitaani Mekongi atuarlugu kuussuup sinaani narsaamanersuit, pukkitsuulluni avannaalu qatsissuuvoq narsaamanersuartalik.

Kiattorsuarmik monsunip klimaanik klimaqarpoq, piffissami maaji-oktobarimi siallersarfeqarluni.

Nunap pisuussutai pingaarnerit tassaapput ermup nukinga (innaallagissiorneq), qisuit, tini nunalu naggorissagaq. Naasorissaaneq inuutissarsiutit pingaarnersaraat, pingaartumillu qaqorteqqasut, majsit, naatsiiat tungusunnitsut, qajuusiassat, annoraassiassat, jordnøddit, soyabønnit, ananasit, kaffit, tiit, tupa kiisalu opium naatinneqartarput.

Laosi nunarsuarmi nunat pitsuunerpaat ilagaat aningaasanillu ikiorserneqarnissaq pisariaqartillugu. Laosi 1953-1973-imi inuisa imminnut sorsuffigaat.