Pakistani Asiap kujataani Arabiap Imartaanut sineriaqarluni kunngiitsuuffiuvoq. Irani, Afghanistani, Kina Indialu killeqarfigai. Nunataa avannaani portusuunik qaqqaqarpoq uiguleriinnik, qatsissumi narsarsuaqarluni, inoqajuitsoqarluni, kitaani qaqqaqarpoq kiisalu kangiani kujataanilu Indusip kuussua atuarlugu angisuunik narsartaqarluni.

Pakistanip kujataatungaa kiattorsuarmik panertumik klimaqarpoq. Avannaa kiattup tulliata silaannaanik nillataarnerusumik, siallerluartartumik klimaqarpoq. Nunap sajuttarneri akulikipput.

Nunap pisuussutai pingaarnerit tassaapput naturgassi, aamarsuit, ermup nukinga nunalu naggorissagaq. Pingaartumik annoraassiassat, sukkut tupalu nunanut allanut tunisassiarineqartarput aammalu qaqorteqqasut, qajuusiassat, naatsiiat naatitallu nammineq atugassat naatinneqartarlutik. Uumasuuteqarneq annertuvoq.

Pakistani 1947-mi Tuluit Nunaannit namminersortunngorami Pakistani Killermut aamma Pakistani Kangillermut avinneqarpoq. Pakistani Kangilleq 1971-imi avissaarpoq naalagaaffillu Bangladeshi pilersinneqarluni. Pakistani Kashmir pillugu Indiamut akerleriissuteqarpoq aaqqiivigineqanngitsumik.