Italia Europap kujataani Appenninerit qeqertaasaaniittoq kunngiitsuuffiuvoq, qeqertat Sicilien aamma Sardinien ilagalugit. Naalagaaffiit mikisut San Marino aamma Vatikanip Naalagaaffia Italiap iluaniipput. Nunataa qaqqartuujuvoq, ilaatigut avannaani Alpit qaqqarsui aamma avannaanit kujataanut qaqqat uiguleriit Appenninerit qaqqaallutik. Qaqqat suli anitsisartut ilaatigut tassaapput Etna aamma Vesuv.

Italiap annersaa ukiukkut siallertartumik kiattumik klimaqarpoq. Avannaa Alpillu nunaviup silaannaanik akunnattumik klimaqarput.

Nunap pinngortitami pisuussutai amerlanngillat, kisianni paarnat naatitallu kiattumik klimaqarfiusumi naasartut kiisalu viinni annertuumik tunisassiaapput. Italia aamma annertuumik suliffissuaqarfiuvoq, ilaatigut biilinik qimuttuitsunillu tunisassiorluni.

Italia ukiorpassuarni politikkikkut eqqissisimaffiusanngilaq, suliffissaaleqineq annertuvoq aningaasarsiornerlu annikitsumik ineriartorpoq. Aaqqissuussamik pinerlunniarneq akuerisaanngitsumillu nunasiffigineqartarneq annertuumik ajornartorsiutaapput. Italia EU-mi NATO-milu ilaasortaavoq.