Tysklandi Europap avannaa-kitaani naalagaaffeqatigiiffiuvoq kunngiitsuuffiusoq. Nordsømut Østersømullu sineriaqarpoq kiisalu Hollandi, Luxembourgi, Belgia, Frankrigi, Schweizi, Østrigi, Tjekkia, Poleni Danmarkilu killeqarfigai. Avannaa nunaavoq sermip nassataralugit unerartitaanik sioraasoq, marraalluni ujaraqarlunilu ippeqartoq, sinerissami masarsoqarfiit, qooqqut, narsat sioraasut paarnaqutitallillu tamaaniipput. Kujaterpiaani qaqqaqarpoq qatsissullu narsartaallutik. Nuna kuuit angisuut arlaqartut aqqusaarpaat.

Akunnattumik klimaqarpoq allanngorartoq, kitaani avannaanilu sinerissap silaa atuuppoq, kujataani kangianilu nunaviup silaa atuulluni.

Pinngortitap pisuussutai pingaarnerit tassaapput aamarsuit ujarannguuttut, aamarsuit kajortut, nuna naggorissagaq, taratsut, saviminisaq, uulia naturgassilu. Tysklandi nunarsuarmi nunat suliffissuaqarnikkut siuarsimanerpaat ilagaat. Kiffartuussineq takornariaqarnerlu annertupput inuutissarsiornermullu pingaartuullutik.

Tysklandi 1949-mit 1990-imut naalagaaffinnut marlunnut avitaavoq: Tysklandi Kangilleq (DDR) aamma Tysklandi Killeq (BRD). Tysklandi EU-mi NATO-milu ilaasortaavoq.